Հայաստանը Կիպրոսում ճանաչվել է 2026 թվականի զբոսաշրջային ուղղություն

15 ապրիլի, 2026

Ապրիլի 15-ին Կիպրոսում Հայաստանի դեսպանության և Կիպրոսի ճամփորդական գրողների և լրագրողների միության (Cyprus Travel Writers and Journalists Society) համատեղ նախաձեռնությամբ կազմակերպել է Հայաստանը Միության կողմից «Զբոսաշրջային ուղղություն 2026» ճանաչելուն և մրցանակի հանձնման արարողությանը նվիրված միջոցառում:

Նիկոսիայում գործող «Փարոս» արվեստի հիմնադրամում (Pharos Arts Foundation) կայացած միջոցառմանը մասնակցել են պաշտոնատար անձինք, դիվանագիտական կորպուսի անդամներ, զբոսաշրջային գործակալությունների և ճամփորդական կազմակերպությունների ներկայացուցիչներ, լրագրողներ, բլոգերներ և ինֆլուենսերներ և այլոք։

Միջոցառման ընթացքում տեղի է ունեցել «Զբոսաշրջային ուղղություն 2026» մրցանակի պաշտոնական հանձնման արարողությունը, որին հաջորդել են համապատասխան կառույցների ներկայացուցիչների ելույթները՝ ընդգծելով զբոսաշրջության ոլորտում երկկողմ համագործակցության խորացման կարևորությունը։

Իր ելույթում դեսպան Իննա Թորգոմյանը կարևորել է շնորհված մրցանակը և շնորհակալություն հայտնել բարձր գնահատականի համար՝ նշելով, որ այն կարևոր հնարավորություն է՝ առավել ներկայացնելու Հայաստանի գրավչությունն ու մրցունակությունը որպես զբոսաշրջային ուղղություն։

Միջոցառման ընթացքում տեսանյութերի և տեղեկատվական նյութերի միջոցով ներկայացվել է Հայաստանի հարուստ մշակութային ժառանգությունը, պատմամշակութային հուշարձանները և զբոսաշրջային ներուժը՝ տրամադրելով երկրի բազմազան զբոսաշրջային հնարավորությունների համապարփակ ներկայացում։

Մասնակիցներին նաև ներկայացվել է հայկական ավանդական խոհանոցը։ Կիպրական «Մեյզ Թրեյդ» (Maze Trade) ընկերության կողմից կազմակերպվել է հայկական արտադրության գինիների համտես։ Մշակութային ծրագիրն ամբողջացվել է հայտնի կիպրահայ երգիչ Հովիկի երաժշտական կատարմամբ։

ՀՀ ԱԳՆ
պաշտոնական կայք

ԵՐԿՔԱՂԱՔԱՑԻՈՒԹՅՈՒՆ

Էլեկտրոնային վիզա

Արտոնագրի ձևեր